admin
Me hidherim njoftojme se eshte ndare nga jeta gjirokastriti Haxhi Aliko, Profesor, pedagog dhe shkencëtar me vlera të jashtëzakonshme.
“Një personalitet i shquar i Shkencave Veterinare, me kontribute shumëvjeçare si drejtues katedre i Fakultetit të Mjekësisë Veterinare dhe Rektor i Universitetit Bujqësor të Tiranës.
Angazhimi i tij më pas në politikë si Deputet dhe Ministër i Bujqësisë, i dha një dimension të ri dhe me peshë, profilit të këtij personaliteti të shquar.
Kam patur fatin të isha student i tij, i frymëzuar nga formimi, stili i tij i veçantë pedagogjik, mënyra e komunikimit dhe elokuenca e pashembullt.
Mbi të gjitha do ta kujtoj gjithmonë si një burrë fisnik dhe me integritet të lartë”, shhkruan ne faqen e tij ne fb ish ministri i Bujqesise Edmond Panariti.
Lamtumirë Profesor Aliko!
x x x
Prof. Haxhi Aliko ka shumë vlerësime, tituj e dekorime në jetën e tij. Ai eshte vlweresuar edhe nga Senati i Universitetit Bujqësor te Tiranes me titullin e lartë “Profesor emeritus”, në shenjë nderimi e respekti ndaj punës dhe për gjithçka që ai mundi të jepte për të mirën e shkollimit dhe për rritjen e standardit të profesionit veterinar.
Jeta e profesor Alikos është e lidhur ngushtë me Fakultetin e Mjekësisë Veterinare, në të cilin u shkollua dhe zhvilloi një karrierë të shkëlqyer akademike 35-vjeçare, duke e filluar si asistent lektor dhe duke vijuar si titullar i lëndës “Fiziologjia e Kafshëve Bujqësore”, përgjegjës i Katedrës “Fiziologji-Biokimi” për 16 vjet dhe deri në Rektor i Universitetit Bujqësor të Tiranës për 4 vjet.
Si pedagog, Prof. Haxhi Aliko ka qenë kompetent i padiskutueshëm në lëndën e fiziologjisë dhe njëherësh tepër metodik e serioz në raport me studentët. Njohuritë e thella, qetësia dhe elokuenca në përçimin e njohurive si dhe formimi i tij kulturor universal, ishin tiparet dalluese që i dhanë atij statusin e një profesori autoritar në mjedisin universitar. Edhe sot e kësaj dite, gjenerata të shumta të studentëve i kujtojnë me nostalgji leksionet e mrekullueshme të Prof. Alikos.
Në kërkimin shkencor Prof. Haxhiu do të mbahet mend për punën serioze dhe këmbëngulëse. Ai i pari filloi dhe udhëhoqi studimin e sëmundjeve metabolike në kushtet e prodhimit blegtoral të vendit, duke hapur shtegun e një kapitulli të ri modern të mjekësisë veterinare.
Aktiviteti shkencor i Prof. Alikos është reflektuar edhe në atë botues. Me emrin e tij numërohen 37 artikuj shkencorë, 7 tekste mësimore, 3 libra e monografi, 7 udhëheqje disertacionesh si dhe botime të tjera të botuara në periodikë të ndryshëm të kohës.
Në funksionin e Rektorit, ai u shqua per integritetin dhe profesionalizmin e tij, duke bërë që të mbahet mend si nj ndër drejtuesit më seriozë dhe me integritet të UBT.
Prof. Haxhi Aliko mbetet një nga personalitetet me gjurmë të pashlyera në historinë e Fakultetit të Mjekësisë Veterinare.
